କଟକରୁ ଯାଜପୁରରୋଡ୍ ଟ୍ୟାକ୍ସି ଭଡ଼ାରେ ନେଲେ, ଚାଳକଙ୍କୁ ହତ୍ୟାକରି ଘସିପୁରା ଅଞ୍ଚଳରେ ଫିଙ୍ଗିଦେଲେ
କଟକ : କଟକ କଲେଜଛକରୁ ଯାଜପୁରରୋଡ ଟ୍ୟାକ୍ସି ନେଇ ଆସିଥିବା ଡ୍ରାଇଭରଙ୍କୁ ହତ୍ୟା କରି କେନ୍ଦୁଝର ଜିଲ୍ଲା ଘସିପୁରା ଥାନା ଅନ୍ତର୍ଗତ ୨୦ ନମ୍ବର ଜାତୀୟ ରାଜପଥର ଦରଖଳା ଅଂଚଳରେ ଫିଙ୍ଗି ଦିଆ ଯାଇ ଥିବା ଅଭିଯୋଗ ହୋଇଛି। ମୃତ ଡ୍ରାଇଭର ହେଉଛନ୍ତି ପୁରୀ ଜିଲ୍ଲା କଣାସ ଥାନା ଛଟିଯୋଡ଼ି ଗ୍ରାମର ଭଗବାନ ବୈରୀଗଞ୍ଜନ।
ସୂଚନା ଅନୁସାରେ ଭଗବାନ ବୈରୀଗଂଜ କିଛି ବର୍ଷ ହେଲା କଟକରେ ରହୁଥିଲେ। ସେ ଏଠାରେ ଟାକ୍ସି ଚଳାଉଥିଲେ। ଗତ ୨୪ ତାରିଖ କଲେଜଛକରୁ ଯାଜପୁରରୋଡ ଟ୍ୟାକ୍ସି ନେଇ ଭଡ଼ାରେ ଯାଇଥିଲେ। ତେବେ ଭଗବାନଙ୍କ ସହ କୌଣସି ଯୋଗାଯୋଗ ନ ହେବାରୁ ତାଙ୍କ ପରିବାର ଲୋକେ କଟକ ମାଲଗୋଦାମ ଥାନାରେ ନିଖୋଜ ମାମଲା ରୁଜୁ କରିଥିଲେ ଏବଂ ନିଖୋଜର ଚାରିଦିନ ପରେ ୨୭ ତାରିଖ କେନ୍ଦୁଝର ଜିଲ୍ଲା ଘସିପୁରା ଥାନା ଅନ୍ତର୍ଗତ ୨୦ ନମ୍ବର ଜାତୀୟ ରାଜପଥର ଦରଖଳା ନିକଟରୁ ଭଗବାନଙ୍କ ଗଳିତ ମୃତଦେହ ଉଦ୍ଧାର କରାଯାଇଥିଲା। ଏନେଇ ଘସିପୁରା ପୁଲିସ ଏକ ଅପମୃତ୍ୟୁ ମାମଲା ରୁଜୁ କରି ମୃତଦେହ ବ୍ୟବଚ୍ଛେଦ କରିବା ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଏହାରି ଭିତରେ କଟକ ନିଆଳି ଗୋବିନ୍ଦପୁର ନଦୀ ବନ୍ଧରୁ ଟ୍ୟାକ୍ସିଟି ଜବତ ହୋଇ ଥିବା ବେଳେ ଗାଡ଼ିକୁ ଭଡାରେ ନେଇ ଥିବା ଲୋକଙ୍କ କୌଣସି ସନ୍ଧାନ ମିଳିପାରି ନାହିଁ।
