ବସ୍ ଦୁର୍ଘଟଣାଗ୍ରସ୍ତ; ୧୦ ମୃତ, ୧୧ ଆହତ
ସିଡ୍ନି: ଅଷ୍ଟ୍ରେଲିଆର ହଣ୍ଟର୍ ୱାଇନ୍ ଅଞ୍ଚଳ ଅନ୍ତର୍ଗତ ସିଡ୍ନିର ଉତ୍ତର ପ୍ରାନ୍ତରେ ଗୋଟାଏ ବସ୍ ଦୁର୍ଘଟଣାଗ୍ରସ୍ତ ହେବାରୁ ୧୦ଜଣ ବ୍ୟକ୍ତିଙ୍କର ମୃତ୍ୟୁ ଘଟିଥିବା ବେଳେ ଆଉ ୧୧ ଜଣ ଆହତ ହୋଇଥିବା କଥା ଆଜି ପୁଲିସ କହିଛି।
ଘଟଣାଟି ରବିବାର ମଧ୍ୟରାତ୍ର ପୂର୍ବରୁ ଘଟିଛି ବୋଲି କୁହାଯାଉଛି। ଗ୍ରେଟା ନାମରେ ଗୋଟାଏ ଛୋଟ ସହର ନିକଟରେ ଥିବା ‘ଜଙ୍କ୍ସନ୍’ରେ ଗୋଟାଏ ବସ୍ ଦୁର୍ଘଟଣାଗ୍ରସ୍ତ ହୋଇ ଓଲଟି ପଡ଼ିଥିବା ଖବର ପୁଲିସକୁ ମିଳିଥିଲା।
ପୁଲିସ କହିଛି, ୧୦ଜଣ ବ୍ୟକ୍ତିଙ୍କର ମୃତ୍ୟୁ ଘଟିଥିବା କଥା ପ୍ରାରମ୍ଭିକ ତଦନ୍ତରୁ ଜଣାପଡ଼ିଛି। ଆହତ ହୋଇଥିବା ୧୧ଜଣ ବ୍ୟକ୍ତିଙ୍କୁ ହେଲିକପ୍ଟର୍ ଓ ସଡ଼କ ପଥରେ ଡାକ୍ତରଖାନାକୁ ପଠାଇ ଦିଆଯାଇଛି। ଏହି ଦୁର୍ଘଟଣାରେ ୧୮ଜଣ ବ୍ୟକ୍ତି ଅନାହତ ଅଛନ୍ତି। କିନ୍ତୁ, ମୃତାହତଙ୍କ ସଂଖ୍ୟା ବୃଦ୍ଧି ପାଇପାରେ।
