ଆଜି ବି ରାଜଧାନୀରେ ପ୍ରଚଣ୍ଡ ତାତି ସାଙ୍ଗକୁ ଅସହ୍ୟ ଗୁଳୁଗୁଳି
ଭୁବନେଶ୍ବର: ରବିବାର ସକାଳୁ ସକାଳୁ ରାଜଧାନୀ ଭୁବନେଶ୍ୱରରେ ପ୍ରଚଣ୍ଡ ତାତି ଅନୁଭୂତ ହେଲାଣି। ଅସହ୍ୟ ଗୁଳୁଗୁଳିରେ ଯୋଗୁ ବି ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ସୂଚନା ଅନୁଯାୟୀ ଆଜି ସକାଳ ୫.୩୦ ସୁଦ୍ଧା ରାଜଧାନୀ ଭୁବନେଶ୍ୱରରେ ତାପମାତ୍ରା ୩୦.୬ ଡିଗ୍ରି ଏବଂ ଆର୍ଦ୍ରତା ୯୦% ରେକର୍ଡ କରାଯାଇଛି। ସକାଳ ସାଢେ ୮ଟା ବେଳେ ରାଜଧାନୀର ତାପମାତ୍ରା ୩୩.୨ ଡିଗ୍ରି ରେକର୍ଡ କରାଯାଇଛି।
ସେହିପରି ସକାଳ ସାଢେ ୮ଟା ବେଳେ ଝାରସୁଗୁଡ଼ାରେ ରାଜ୍ୟର ସର୍ବାଧିକ ତାପମାତ୍ରା ୩୭.୪ ଡିଗ୍ରି ରହିଥିବା ବେଳେ ସମ୍ବଲପୁରରେ ୩୬.୪ ଡିଗ୍ରି, ହୀରାକୁଦରେ ୩୫.୬ ଡିଗ୍ରି, ଚାନ୍ଦବାଲିରେ ୩୩.୮ ଡିଗ୍ରି, ପୁରୀରେ ୩୨.୬ ଡିଗ୍ରି , ବାଲେଶ୍ୱରରେ ୩୨.୨ ଡିଗ୍ରି, ଗୋପାଳପୁରରେ ୩୨ ଡିଗ୍ରି, କେନ୍ଦୁଝରରେ ୩୨ ଡିଗ୍ରି ଓ ପାରାଦୀପଠାରେ ୩୧.୮ଡିଗ୍ରି ରେକର୍ଡ କରାଯାଇଛି।
ଅନ୍ୟପକ୍ଷରେ ଆହୁରି ୨ ଦିନ ତାତିରୁ ନିସ୍ତାର ନାହିଁ। ଆଗାମୀ ୨ ଦିନ ଯାଏଁ ଦିନ ତାପମାତ୍ରାରେ ବିଶେଷ ପରିବର୍ତ୍ତନର ସମ୍ଭାବନା ନାହିଁ। ପରବର୍ତ୍ତୀ ସମୟରେ ଦିନ ତାପମାତ୍ରା ସାମାନ୍ୟ ତଳକୁ ଖସିବା ସମ୍ଭାବନା ରହିଛି। ଆଗାମୀ ୨ ଦିନ ଉପକୂଳ ଏବଂ ୩ ଦିନ ଯାଏଁ ପଶ୍ଚିମ ଓଡ଼ିଶାରେ ଭୀଷଣ ଗ୍ରୀଷ୍ମ ପ୍ରବାହ ସମ୍ଭାବନା ଥିବା ନେଇ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି। ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ସୂଚନା ମୁତାବକ, ଆସନ୍ତା ୧୯ ତାରିଖ ଯାଏ ରାଜ୍ୟରେ ଏହିଭଳି ତାତି ଜାରି ରହିବ। ୨୦ ତାରିଖରୁ ତାତି କମିବ।
