ଜୁଡ଼ିଆ ଘାଟିରେ ଭୂସ୍ଖଳନ

କେନ୍ଦୁଝର : କେନ୍ଦୁଝର ଜିଲ୍ଲା ଜୁଡ଼ିଆ ଘାଟିରେ ଭୂସ୍ଖଳନ ହୋଇଛି । ଆଜି ସକାଳେ ପାହାଡ଼ ଧସି ବଡ଼ ପଥର ଖଣ୍ଡ ରାସ୍ତା ଉପରେ ପଡ଼ିବା ଯୋଗୁ ଯାତାୟାତ ବାଧାପ୍ରାପ୍ତ ହୋଇଛି । ତେବେ ଏଥରେ କେହି ମୃତାହତ ହୋଇ ନ ଥିବା ଜଣାଯାଇଛି। ଘାଟିରେ ଗୋଟିଏ ମିନି ଟ୍ରକ୍ ଯାଉଥିବା ବେଳେ ତାହା ଉପରେ ପଥର ଖଣ୍ଡ ଧସିଯାଇଛି । ଫଳରେ ଗାଡ଼ିଟି ଅଟକି ରହିଥିବା ବେଳେ ଏହାର ଡ୍ରାଇଭର, ହେଲପରଙ୍କ ପତ୍ତା ମିଳିନି। ତେବେ ସେମାନେ ଘଟଣାସ୍ଥଳରେ ଉପସ୍ଥିତ ନ ଥିବାରୁ ହୁଏତ ଆହତ ହୋଇ ମେଡିକାଲ ପଳାଇଥିବା ଅନୁମାନ କରାଯାଉଛି।  ବଡ଼ ବଡ଼ ପଥର ଖଣ୍ଡ ରାସ୍ତାରେ ଛିଟିକି ପଡ଼ିଥିବାରୁ ଏନଏଚ୍ -୪୯ର ଗୋଟିଏ ପାର୍ଶ୍ୱରେ ଯାତାୟାତ ବନ୍ଦ ହୋଇଯାଇଛି ।  ଗୋଟିଏ ପାର୍ଶ୍ୱ ରାସ୍ତାକୁ ବନ୍ଦ କରି ଦିଆଯାଇଛି। ରାଜରାସ୍ତାକୁ ସଫା କରିବାକୁ ଯୁଦ୍ଧକାଳୀନ ଭିତ୍ତିରେ କାମ ଆରମ୍ଭ ହୋଇଥିବା ଜାତୀୟ ରାଜପଥ ଅଧିକାରୀ କହିଛନ୍ତି।