ଘାଟିରେ ଓଲଟି ପଡ଼ିଲା ବସ୍
କେନ୍ଦୁଝର : ଯାତ୍ରୀବାହୀ ବସ୍କୁ ଏକ ଚାଉଳ ବୋଝେଇ ଟ୍ରକ୍ ପଛରୁ ପିଟିବା ଫଳରେ ନିୟନ୍ତ୍ରଣ ହରାଇ ଘାଟି ରାସ୍ତାରୁ ତଳକୁ ଓଲଟି ପଡ଼ିଲା ବସ୍। ଏହି ଦୁର୍ଘଟଣାରେ ୧୫ ଜଣ ଗୁରୁତର ହୋଇଛନ୍ତି। ଏପରି ଏକ ଦୁର୍ଘଟଣା ସୋମବାର ବିଳମ୍ବିତ ରାତିରେ କେନ୍ଦୁଝର ଜିଲ୍ଲା ଆନନ୍ଦପୁର ବ୍ଳକ ଗୋଦଭଙ୍ଗା ଘାଟିରେ ଘଟିଛି। ଗତ ରାତିରେ ମୟୂରଭଞ୍ଜ ଜିଲ୍ଲା ଜାମଦାରୁ ଏକ ବସ୍ ଭୁବନେଶ୍ୱର ଅଭିମୁଖେ ଯାଉଥିଲା। ଉକ୍ତ ସମୟରେ ବସ୍ରେ ପ୍ରାୟ ୫୦ ଯାତ୍ରୀ ଥିଲେ। ରାତି ପ୍ରାୟ ଦେଢଟା ସମୟରେ ବସ୍ଟି ଗୋଦଭଙ୍ଗା ଘାଟି ଅତିକ୍ରମ କରୁଥିଲା। ଏହି ସମୟରେ ପଛରୁ ଆସୁଥିବା ଏକ ଚାଉଳ ବୋଝେଇ ଟ୍ରକ୍ ପଛରୁ ବସ୍କୁ ଧକ୍କା ଦେଇଥିଲା । ଫଳରେ ଭାରସାମ୍ୟ ହରାଇ ବସ୍ଟି ଘାଟି ତଳକୁ ଓଲଟି ପଡ଼ିଥିଲା।
ଗୋଦଭଙ୍ଗା ଘାଟି ନିଛାଟିଆ ହୋଇଥିବାରୁ ଉକ୍ତ ବାଟ ଅତିକ୍ରମ କରୁଥିବା ଅନ୍ୟ ବସ୍ ଦୁର୍ଘଟଣା ଘଟିଥିବା ଦେଖି ଅଟକିଥିଲେ। ଏହାପରେ ସେମାନେ ସ୍ଥାନୀୟ ଲୋକଙ୍କ ସହାୟତାରେ ଯାତ୍ରୀମାନଙ୍କୁ ବସ୍ରୁ ବାହାର କରିଥିଲେ। ସେମାନଙ୍କ ମଧ୍ୟରୁ ୧୫ ଜଣଙ୍କ ଅବସ୍ଥ ଗୁରୁତର ଥିବାରୁ ସେମାନଙ୍କୁ ଆନନ୍ଦପୁର ମେଡିକାଲ ପଠାଯାଇଛି। ଅନ୍ୟ ଯାତ୍ରୀଙ୍କୁ ନିଜ ନିଜ ଗନ୍ତବ୍ୟ ସ୍ଥଳ ଅଭିମୁଖେ ପଠାଇ ଦିଆଯାଇଛି। ଖବର ପାଇ ପୁଲିସ୍ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି।
