ପଥରରେ ଛେଚି ଯୁବକଙ୍କୁ ହତ୍ୟା

କୋରାପୁଟ: ଜମି ବିବାଦକୁ ନେଇ କୋରାପୁଟ ଜିଲ୍ଲା ମାଛକୁଣ୍ଡ ଥାନା ଅନ୍ତର୍ଗତ ହନୁମାଲ ଗାଁରେ ଜଣେ ଯୁବକଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି। ମୃତ ଯୁବକଙ୍କ ନାଁ ବନ୍ଧୁ ବଡ଼ନାୟକ। ଗୁରୁବାର ସକାଳେ ସେ ଗାଁ ନିକଟ ଜଙ୍ଗଲକୁ ଗାଈ ଚରାଇବାକୁ ଯାଇଥିଲେ। ସେଠାରେ ତାଙ୍କୁ ଗାଁର ଶୁକ୍ରା ବଡ଼ନାୟକ ଓ ଡମୁ ବଡ଼ନାୟକ ତାଙ୍କୁ ପଥରରେ ଛେଚି ଓ କୌଣସି ଧାରୁଆ ଅସ୍ତ୍ରରେ ଆକ୍ରମଣ କରି ହତ୍ୟା କରିଥିବା ଅଭିଯୋଗ ହୋଇଛି। ସୂଚନା ଅନୁଯାୟୀ, ବନ୍ଧୁଙ୍କୁ ମାରିବା ପାଇଁ ଶୁକ୍ରା ଓ ଡମୁ ପୂର୍ବରୁ ଯୋଜନା କରିଥିଲେ। ବନ୍ଧୁଙ୍କୁ ହତ୍ୟା କରାଯାଇଥିବା ଖବର ପ୍ରଚାର ହେବା ମାତ୍ରେ ଗାଁ ଲୋକେ ସେଠାରେ ରୁଣ୍ଡ ହୋଇଥିଲେ। ଗାଁରେ ଉତ୍ତେଜନା ପ୍ରକାଶ ପାଇଥିଲେ। ଉତ୍ତ୍ୟକ୍ତ ଗାଁ ଲୋକେ ଅଭିଯୁକ୍ତ ଶୁକ୍ରା ବଡ଼ନାୟକ ଘରେ ଭଙ୍ଗାରୁଜା କରିବା ସହିତ ନିଆଁ ଲଗାଇ ଦେଇଥିଲେ। ପୁଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହିତ ଘଟଣାର ତଦନ୍ତ କରୁଛି।